Demografia trantsizioa

Antzinako demografia-erregimenetik demografia-erregimen modernorako igarobideari demografia-trantsizio deritzo. Antzinako erregimenak jaiotza- eta heriotza-tasa handiak (bigarrenak askotan hondamendien ondoriozkoak) zituen ezaugarri; trantsizioan, berriz, bi tasak murriztu egin ziren.

Demografia-trantsizioan zehar, biztanle kopurua oso azkar handitu zen, jaiotza- eta heriotza-tasen joera aldatu ahala.

Herrialde garatuetako demografia-erregimenak modernoak dira, baina garapen-bidean daudenak demografia-trantsizioa gauzatzen ari dira.

---

Antzinako demografia-erregimenaren ezaugarriak

• Industrializazioaren aurreko gizartea edo gizarte tradizionala.
• Berezko demografia-oreka: jaiotza- eta heriotza-tasak handiak.
• Biztanleria-hazkundea ia hutsaren parekoa edo oso txikia.
• Batez besteko bizi-itxaropena: 25-30 urtekoa.

Arrazoiak:

• Jaiotzen kontrolik eza.
• Izurriak eta gaixotasunak.
• Uzta txarrak eta gerrak: gosea.

Europan, XVIII. mendera arte (Industria Iraultzara arte) iraun zuen. Gaur egun, ez dago herrialderik egoera horretan, baina bai zenbait giza talde isolatu (antzinako herriak edo tribuak).

* Antzinako gizarteetan, jaiotza- eta heriotza-tasak oso handiak ziren, eta biztanle kopurua egonkorra.

Zer gertatu zen demografia-trantsizioan zehar?

• Gizarte industriala.
• Heriotza-tasa murriztu egin zen, baina jaiotza-tasak handia izaten jarraitu zuen. Biztanle kopurua hazi egin zen. Jaiotza-tasak behera egin ahala, heriotza-tasa nabarmen murriztu zen.
• Biztanle kopurua erruz handitu zen.

Arrazoiak:

• Hobekuntzak ekonomiaren eta osasunaren alorretan.
• Elikadura hobea.
• Jaiotza kontrolatzeko politikak (seme-alaba gutxiago izateko).

Europan, Industria Iraultza osoan zehar iraun zuen, XX. mendeko 20ko hamarkadara arte. Gaur egun, horixe ari da gertatzen herrialde pobreetan eta garapen-bidean daudenetan.

* Demografia-trantsizioan, desoreka sortu ohi da jaiotza eta heriotza kopuruen artean.

Demografia-erregimen modernoaren ezaugarriak

• Gizarte modernoa, industrializazioaren ondokoa.
• Oso heriotza- eta jaiotza-tasa txikiak.
• Biztanle kopurua oso motel hazten da, eta, zenbaitetan, batere ez (0 hazkundea).
• Bizi-itxaropena luzatu egiten denez, biztanle zaharren kopurua handia izaten da .

Arrazoiak:

• Ekonomia-garapena.
• Emakumeak lan-merkatuan sartu izana.

Erregimen hori zibilizazio hiritar eta industrialarekin bat dator. Herrialde garatuen ezaugarria da.

Gizarte modernoetan, jaiotza- eta heriotza-tasak oso txikiak dira, eta biztanle kopurua egonkorra.